తెలంగాణా లో R.I లను గిర్దావర్ లుగా మార్చినోళ్లు , S.I లను రజాకార్ లుగా మారుస్తారేమో !!?

                                                               

భవిష్యత్ లో తెలంగాణా రెవిన్యూ జాబ్స్ నోటిఫికేషన్ పాకిస్తాన్ లో మాదిరి ఇలాగే ఉండబోతుందా ? 

                                     ఆంధ్ర ప్రదేశ్ నుండి విడిపోయేటప్పుడు తెలంగాణా అభివృద్ధి గురించి చాలా మందికి అనుమానాలు ఉన్నాయి .ఆ అనుమానాలను పటాపంచలు చేయడంలో సపలమయ్యారు తెలంగాణా ముఖ్య మంత్రి శ్రీ కలువకుంట్ల చంద్ర శేఖర రావు గారు.అయితే కొన్ని తెరచాటు వర్గాలు ఆయన్ని ఎలా అయిన అప్రతిష్టల పాలు చేయాలని చూస్తున్నట్లు ఉన్నాయి. అందులో భాగంగా తమ ఇష్టాలను ప్రజల మీద రుద్దుతూ ఇదంతా ముఖ్యమంత్రి గారి ఇష్ట ప్రకారమే జరుగుతున్న దని.ప్రజల్ని నమ్మిస్తూ వారిని నోరెత్త కుండా చేస్తున్నారు.అందులో భాగమే ఇటీవలి రెవిన్యూ అధికారుల హోదా పేర్లు మార్పు విషయం.

     జాగీర్దారీ భూస్వామ్య నిరంకుశత్వంలో శతాబ్దాలుగా పీడనకు గురి అయిన తెలంగాణా ప్రజలు, భారత దేశానికీ స్వాతంత్య్రం సిద్దించాక కూడా తమకు స్వాతంత్య్రం దొరకక మరొక స్థానిక స్వాతంత్ర్య పోరాటం చేయాల్సి వచ్చింది . ఆ పోరాటాన్ని అణచివేయడానికి ఆ నాటి నిజాం ప్రభుత్వం "రజాకార్ " అనే జిహాదీ గ్రూపులను తయారు చేసి  ప్రజలను ఊచకోత కోయించింది . ఆ అరాచక పాలనను అంతం చేయడానికి చివరకు భారత ప్రభుత్వం మిలటరీ ఆపరేషన్ కు ఆదేశించడం తో నిజాం లొంగిపోయి తెలంగాణను కూడా స్వతంత్ర భారతం లో భాగం చేయటం జరిగింది. ఈ  సంఘటనలు కళ్లారా కాంచిన వృద్దులు కొంతమంది ఈ  నాటికి   తెలంగాణలో సజీవ సాక్ష్యాలుగా మిగిలి ఉన్నారు.

   తెలంగాణలో ప్రజలను అణచివేసి భూస్వాముల అడుగులకు మడుగులొత్తేలా చేయడం లో సఫలీకృతమైన వ్యవస్థలు గ్రామంలోని పటేల్ మరియు పట్వారి వ్యవస్థ. పటేల్ గ్రామ పోలీసుగా వ్యవహరిస్తే , పట్వారి గ్రామ కరణంగా రెవిన్యూ పనులు చక్కపెట్టేవాడు. తెలంగాణలో ఈ నాటికి రెవిన్యూ రికార్డులు ఆంధ్రాలో మాదిరి సక్రమంగా లేకపోవటానికి  కారణం నాటి పట్వారీల రెవిన్యూ రికార్డుల రాతల మెళుకువలను ఆ తర్వాత వచ్చిన రెవిన్యూ అధికారులు కొనసాగిస్తూ ఉండడమే.రైతు రికార్డు ప్రకారం ఒక సర్వే నంబర్ లో ఉంటె , వాస్తవంగా మరొక సర్వ్ నంబర్ భూమిని సాగు చేస్తూ ఉండడం ,  భూమి  వాస్తవ అధీనం లో ఒకరు ఉంటె , మరొకరి పేరు ఎక్కించడం , ఆ పేరు ఎక్కిన వారు  వారి పేరు మీద బ్యాంకు లో లోన్ లు తీసుకోవడం లాంటి జిమ్మిక్కులు,  తెలంగాణా రెవెన్యూ రికార్డుల్ల చరిత్రలో కో కొల్లలు. దీనంతటికి మూల కారణం N.T.R గారి ప్రభుత్వం ఒక్క కలం పోటుతో పట్వారి వ్యవస్థను రద్దు చేయగలిగింది కానీ ,  రాష్ట్రం లోని భూములను రి సర్వే చేయించి, రికార్డులను రీ సర్వే  వివరాలతో వెరిపై చేయించి , సరి చేయించి  ఆంధ్ర ప్రాంతం లో మాదిరి ఒక క్రమ పద్దతిలో ఉంచడంలో మాత్రం విఫలమయింది . అందుకే ఆ తర్వాతి రెవెన్యూ ఆపీసర్లు సహితం పట్వారీల రికార్డులు ను పాలో అవటం తో పాటు వారి అలవాట్లను కూడా అనుసరించడం తో  తెలంగాణా ప్రజలు మనస్సులోనుంచి పట్వారి లు పూర్తిగా తొలగి పోలేదు సరి కదా " పట్వారీ వ్యవస్థే  నయం " అనే భావనకు కూడా వచ్చ్హారు .  

             మొన్నటికి మొన్న తెలంగాణా ముఖ్యమంత్రి గారు శ్రీ చంద్ర శేఖర్ రావు గారు తెలంగాణా రెవిన్యూ రికార్డులను ఒక క్రమపద్ధతిలో ఏర్పాటు చేయాలనే తలంపుతో ఎవరూ చేయని విదంగా ఉదార హృదయంతో 5 ఎకరాలు లోపు రైతులకు జూన్ 2 2014 వరకు రైతులు మద్య జరిగిన భూ కొనుగోళ్లు పత్రాలు అన్నింటిని  ప్రీ రిజిస్ట్రేషన్ ద్వారా క్రమబద్దీకరించి రైతులకు డిజిటల్ పట్టాదార్ పాస్ బుక్ జారీ చేయించాలని ఉత్తర్వులు జారీ చేసినప్పటికీ , పట్వారి భావజాల వారసులైన గ్రామ స్థాయి రెవెన్యూ అధికారులు అందుకు యదా శక్తి తమ మోకాలడ్డుతున్నారు. G.O ప్రకారం ఉచిత రిజిస్ట్రేషన్ అనేది పరాయి వాళ్ళ నుండి కొనుగోలు చేసిన రైతులకు మాత్రమే వర్తిస్తుంది తప్పా , కుటుంబ సభ్యుల మధ్య జరిగిన లావాదేవీలకు వర్తించదని సగం అప్లికేషన్ లు తిరస్కరించారు. అలాగే షెడ్యూల్డ్ ఏరియాలో 1970 తర్వాత జరిగిన  లావాదేవీలకు వర్తించదని మరో 40% అప్లికేషన్లు తిరస్కరించారు . ఇక మిగిలిన 5 నుండి 10% అప్లికేషన్ లు పరిష్కరించినా దాని వలన తెలంగాణా రెవెన్యూ రికార్డులు ఒక క్రమపద్ధతిలో ఏర్పడటం కలగానే మిగిలిపోనున్నది. ఇలా అస్త్యవస్థ రెవెన్యూయె రికార్డులు ఉన్నంతకాలమే  కదా  రెవెన్యూ అధికారులకు కాసుల పంట పండేది. 

    ఇక ప్రస్తుతానికి వస్తే ముఖ్యమంత్రి గారి సంచలనాత్మక నిర్ణయం వలన పరిపాలన వికేంద్రిరికరణ లో భాగంగా 10 జిల్లాల తెలంగాణా 31 జిల్లాల తెలంగాణగా రూపుదిదుకుంది. అందుకు ప్రజలు ఏంతొ  సంతోషిస్తున్నారు . కానీ ఒక విషయం లో మాత్రం తెలంగాణా ప్రజలకు బాధగా ఉంది. నిజాముల కాలం నాటి రెవెన్యూ అధికార వ్యవస్థల పే ర్లను తిరిగి ప్రవేశ పెట్టడం తిరిగి అలనాటి పీడనా తాలూకు జ్ఞాపకాలను గుర్తు చేయడమే అవుతుంది తప్పా దాని వలన ప్రజలకు ఒరిగేదేమి లేదు.మండలాలను తెహసిలుగా, ఎమ్మార్వో ని తెహసిల్దారుగా, డిప్యూటీ ఎమ్మార్వో ని నాయిబ్ తెహసిల్దారుగా, R.I ని గిర్దావర్ గా, రెవెన్యూ అసిస్టంట్ ను నాయిబ్ గిర్దావర్ గా వ్యవహరించాలని కోరుతూ ఉత్తర్వులు ఇస్తున్నారంట . ఇలా తెలంగాణా ప్రాంత గత పీడనా తాలుకు పేర్లను తిరిగి అధికారులకు పెట్టదం లో ఉన్న మతలబ్ ఏమిటి ? తెలంగానా రెవెన్యూ మంత్రి గారు నిజాం గారి సామాజిక వర్గానికి చెందిన వారు కాబట్టి ఆయనగారికి ఇష్టం అని చెప్పి వాటిని  తెలంగాణా ప్రజల మీద రుద్దుతున్నారా?  లేక వెనుకటి నిజాం కాలం నాటి పట్వారీ వ్యవస్తనే అమలులొకి తెనున్నారా? దీని మీద రెవెన్యూ డిపార్త్మెంట్ వారు ప్రజలకు వివరణ ఇవ్వాల్సిన అవసరం ఉంది. 

                                    ఇలా రెవెన్యూ అధికారులు పేర్లు మార్చి తమ ఉనికిని  చాటుకోవాలని తహ తహ లాడె తెరచాటు వర్గాలు, ఈ రోజు  R.I లను గిర్దావర్ లుగా మార్చినోళ్లు  , రేపు S.I లను రజాకార్ లుగా మారుస్తారేమో    అని అనుమానంగా ఉంది .   కాబట్టి తెలంగాణా రెవెన్యూ అధికారుల హోదా ల పేర్లు మార్చడం వలన ప్రజలకు ఏ విధంగా లాభమో రెవిన్యూ వర్గాలు చెప్పాలి . తెలంగాణా ముఖ్యమంత్రి గారు ఈ  విషయం లో   పునరాలోచన చేసి, తెలంగాణా ప్రజలుకు  గత కాలపు చేదు అనుభవాలను గుర్తు చేసే అధికార హోదాల పేర్లు కాక , అలవాటుపడిన   అమలులో ఉన్న పేర్లనే కొనసాగించాలని కోరడమైనది.